აჭარის ავტონომიური რესპუბლიკის უმაღლესი საბჭოსა და მთავრობის თავმჯდომარეები - დავით გაბაიძე და თორნიკე რიჟვაძე, მარიამობის დღესასწაულთან დაკავშირებით, ბათუმისა და ლაზეთის მიტროპოლიტთან, მეუფე დიმიტრისთან მიღებაზე იმყოფებოდნენ. შეხვედრას ესპანეთში მცხოვრები ბაგრატიონთა შტოს წარმომადგენელი პრინცი ხუან იოანე ბაგრატიონი და პრინცის მეუღლე ქრისტინე ძიძიგური ესწრებოდნენ.
საპატრიარქოს რეზიდენციაში გამართული შეხვედრის შემდეგ დავით გაბაიძე, თორნიკე რიჟვაძე და იოანე ბაგრატიონი, მეუფე დიმიტრისთან ერთად, ბათუმის ღვთისმშობლის შობის საკათედრო ტაძარში მივიდნენ, სადაც ყოვლადწმიდა ღვთისმშობლის მიძინების აღსანიშნავი ლიტურგია ჩატარდა.
ქრისტიანულ სამყაროში ყოვლადწმიდა სამების შემდეგ ღვთისმშობელი მარიამი იდიდება. უდიდეს ათთორმეტ დღესასწაულთაგან სამი - ღვთისმშობლის შობა, მიძინება და ყოვლადწმიდა მარიამის ტაძრად მიყვანება უშუალოდ ღვთისმშობლისადმია მიძღვნილი. ღვთისმშობლის წილხვედრ ჩვენს ქვეყანაში მარიამობის დღესასწაულს განსაკუთრებით აღნიშნავენ.
მარიამობის დღესასწაულს წინ, ტრადიციულად, ორკვირიანი მარხვა უძღოდა.