საიტი მუშაობს ტესტირების რეჟიმში

საქართველოს ქვემო სილეზიის დელეგაცია ეწვია

11 მაისი

11 მაისს საქართველოს ოფიციალური ვიზიტით ქვემო სილეზიის 12-კაციანი დელეგაცია ეწვია, რომლის შემადგენლობაში არიან: ქვემო სილეზიის სავოევოდოს მარშალი ცეზარ პშივილსკი, ქვემო სილეზიის პარლამენტის (სეიმიკის) თავმჯდომარე პაველ ვრუბლევსკი, პარლამენტის წევრები, ქალაქ მილიჩის საკრებულოს თავმჯდომარე ზდისლავ იაშინსკი, ამავე ქალაქის ვიცე-მმართველი სლავომირ სტრელეცკი და სავოევოდოს საკანონმდებლო და აღმასრულებელი ხელისუფლების სხვა წარმომადგენლები.

ვიზიტის პირველ დღეს დელეგაციის წევრები თბილისში, საქართველოს პარლამენტის ბაგრატოვანთა დარბაზში აჭარის ავტონომიური რესპუბლიკის უმაღლესი საბჭოსა და მთავრობის თავმჯდომარეებს - დავით გაბაიძესა და ზურაბ პატარაძეს, აჭარის უმაღლესი საბჭოს თავმჯდომარის მოადგილეს მერაბ კარანაძეს, განათლების, კულტურისა და სპორტის მინისტრს ინგა შამილიშვილს შეხვდნენ.

-პოლონეთი და საქართველო მეგობარი და პარტნიორი ქვეყნებია. პოლონეთი ყოველთვის უჭერდა მხარს საქართველოს ტერიტორიულ მთლიანობას, მის ინტეგრაციას ევროპულ და ევრო-ატლანტიკურ სტრუქტურებში. სასიხარულოა, რომ ჩვენს ქვეყნებს შორის ურთიერთობები რეგიონებს შორის გრძელდება, - აღნიშნა აჭარის უმაღლესი საბჭოს თავმჯდომარემ დავით გაბაიძემ.

შეხვედრას ესწრებოდნენ საქართველოს პარლამეტის თავმჯდომარის მოადგილეები - გიორგი ვოლსკი, ილია ნაკაშიძე და პოლონეთის საგანგებო და სრულუფლებიანი ელჩი საქართველოში მარიუშ მაშკევიჩი.

მხარეებმა ისაუბრეს ორ ქვეყანას შორის მეგობრული და საქმიანი ურთიერთობების გაღრმავების მნიშვნელობაზე და დასახეს მომავალი თანამშრომლობის გეგმები.

განცხადებები

დღის წესრიგი

პრეს-რელიზი