უმაღლეს საბჭოში საგაზაფხულო სესია პლენარული სხდომით დაიხურა

18 ივნისი

 აჭარის ავტონომიური რესპუბლიკის უმაღლესი საბჭოს საგაზაფხულო სესიის ბოლო პლენარულ სხდომაზე, კანონმდებელთა განცხადებების შემდეგ, „მინისტრის საათის ფორმატში“ ფინანსთა და ეკონომიკის მინისტრს მოუსმინეს. ჯაბა ფუტკარაძემ 2019-2020 წლებში განხორციელებულ, მიმდინარე პროექტებზე, საბიუჯეტო და ეკონომიკურ მაჩვენებლებზე, საშუალოვადიან პრიორიტეტებზე, პანდემიით გამოწვეული ვითარების დაძლევის მიზნით გატარებულ ღონისძიებებსა და რიგ სხვა მნიშვნელოვან მიმართულებებზე ისაუბრა.
 მომხსენებლის განცხადებით, 2019 წლის ბიუჯეტი შემოსულობების ნაწილში - 106, 2 % -ით, ხოლო ხარჯვითი ნაწილში - 95,3 % -ით შესრულდა. 2019-2020 წლებში რეგიონის შიდა პროდუქტის მოცულობამ 4,3 მილიარდი ლარი შეადგინა, რაც მთლიანად ქვეყნის შიდა პროდუქტის 9 %-ია. 51 %-იანი ზრდა დაფიქსირდა უცხოური ინვესტიციების მოზიდვის მიმართულებით და საინვესტიციო პორტფელის ოდენობამ 4 მილიარდს გადააჭარბა. მინისტრისავე განცხადებით, რეგიონში დღეისათვის არ არსებობს არცერთი შეჩერებული პროექტი, ამასთან, წარმატებით რეალიზდება ისეთი პროექტები, როგორებიცაა: „ოცნების“, „ განათლებისა და მეცნიერებისა“ და „მწვანე“ ქალაქების მშენებლობა. მინისტრმა ყურადღება გაამახვილა ინფრასტრუქტურულ, მყარი ნარჩენების მართვისა და სხვა მნიშვნელოვან პროექტებზე და უპასუხა დეპუტატების შეკითხვებს.
 უმაღლესი საბჭოს თავმჯდომარის დავით გაბაიძის შეფასებით, მოხსენება იყო მოცულობითი და სრულად ასახავდა რეგიონში არსებულ რეალობას.
 რამდენიმე საათიანი მოსმენის შემდეგ ფინანსთა და ეკონომიკის მინისტრის მოხსენება კანონმდებლებმა ცნობად მიიღეს.
 სხდომაზე13 ხმით, 2-ის წინააღმდეგ დამტკიცდა კანონის პროექტი ,,აჭარის ავტონომიური რესპუბლიკის ქონების მართვისა და განკარგვის შესახებ“ აჭარის ავტონომიური რესპუბლიკის კანონში ცვლილების შეტანის თაობაზე». აჭარის მთავრობის თავმჯდომარის მიერ ინიცირებული კანონის პროექტის გადამუშავებული ვარიანტი, კანონმდებლებმა გამარტივებული წესით _ ერთი მოსმენით განიხილეს და იგი ფინანსთა და ეკონომიკის მინისტრის მოადგილემ თინათინ ზოიძემ წარმოადგინა.
 პლენარულ სხდომაზე რამდენიმე საათი დაეთმო საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს 2019 წლის საქმიანობის ანგარიშს, რომელიც მაუწყებლის მრჩეველთა საბჭოს თავმჯდომარემ გიგა ჩხარტიშვილმა წარმოადგინა. მომხსენებელმა მაუწყებლის პროგრამულ ნაწილზე, სამაუწყებლო ბადეზე, ბიუჯეტზე, საზოგადოებრივი კვლევის შედეგებზე, რეიტინგებზე, შიდა და გარე აუდიტის დასკვნებსა და რიგ სხვა საკითხებზე ისაუბრა, უპასუხა უმაღლესი საბჭოს წევრების შეკითხვებს. სხდომაზე პასუხები გაეცა დაინტერესებული მოქალაქეებისა და სამოქალაქო აქტივისტების შეკითხვებსაც, რომლებიც, კანონმდებლობიდან გამომდინარე, დეპუტატებმა გააჟღერეს.

 წარმოდგენილი ანგარიში უმაღლესი საბჭოს წევრებმა ცნობად მიიღეს.

 12 ხმით დამტკიცდა კანონის პროექტი ,,აჭარის ავტონომიურ რესპუბლიკაში განათლების ხელშეწყობის შესახებ“, რომელიც სხდომაზე I მოსმენით განათლების, მეცნიერების, კულტურისა და სპორტის საკითხთა კომიტეტის თავმჯდომარემ ლადო მგალობლიშვილმა გამოიტანა. რაც შეეხება, დღის წესრიგის ბოლო საკითხს, უმაღლესი საბჭოს დადგენილების პროექტი ,,აჭარის ავტონომიური რესპუბლიკის უმაღლესი საბჭოს 2021 წლის ბიუჯეტის პროექტის დამტკიცების შესახებ“, რომელიც საფინანსო-საბიუჯეტო და ეკონომიკურ საკითხთა კომიტეტის თავმჯდომარემ გიორგი რომანაძემ წარმოადგინა, 13 ხმით დამტკიცდა.
 18 ივნისის პლენარული სხდომით უმაღლესი საბჭოს საგაზაფხულო სესია დაიხურა, თუმცა, როგორც საკანონმდებლო ორგანოს თავმჯდომარემ დავით გაბაიძემ აღნიშნა, ზაფხულში კანონმდებლები აქტიურად გააგრძელებენ მუშაობას კანონპროექტებზე, რომელთა შორის ერთ-ერთი უმნიშვნელოვანესი კონსტიტუციური კანონია.