12 ოქტომბერი

   აჭარის ავტონომიური რესპუბლიკის უმაღლესი საბჭოს თავმჯდომარე დავით გაბაიძე და უმაღლესი საბჭოს წევრები - ნუგზარ სურმანიძე, დავით თედორაძე, ილია ვერძაძე, სასტუმრო „ეიფორიაში“, აგრო-სასურსათო პროდუქციისა და ახალი ტექნოლოგიების მე-8 საერთაშორისო გამოფენა-გაყიდვის - "Agro Batumi 2018-ის“ გახსნის ღონისძიებას დაესწრნენ.

    ორგანიზატორებთან ერთად,  ლენტი აჭარის საკანონმდებლო და აღმასრულებელი ხელისუფლების წევრებმა , თურქეთის გენერალურმა კონსულმა ქალაქ ბათუმში მაქბულე ქოჩაკმა და საპატიო  სტუმრებმა გაჭრეს.

    საგამოფენო კომპანია „GEONET EXPO-სა“  და სოფლის მეურნეობის სამინისტროს მიერ  ორგანიზებული   აგრო-სასურსათო პროდუქციისა და ტექნოლოგიების  გამოფენა-გაყიდვა სამ დღეს გაგრძელდება და მისი თანაორგანიზატორები   აჭარის ავტონომიური რესპუბლიკის მთავრობა, აჭარის სოფლის მეურნეობის სამინისტრო, აგროსერვის ცენტრი,  ქალაქ ბათუმის მერია, აჭარის სავაჭრო-სამრეწველო პალატა, საქართველოს საერთაშორისო ინვესტორთა ასოციაცია  და სარეკლამო კომპანია „OL PRINT” არიან. გამოფენაზე ქართული, პოლონური, უკრაინული, თურქული, ნორვეგიული და ირანული ნაწარმია წარმოდგენილი.

    "Agro Batumi 2018-ში»  მონაწილე კომპანიები მომხმარებელს გააცნობენ და  რეკლამირებას გაუწევენ საკუთარ პროდუქციას. გარდა ამისა, გამოფენა-გაყიდვა ბიზნესმენებს  ახალი კონტაქტების დაამყარებისა და თანამშრომლობის მემორანდუმების გაფორმების საშუალებას აძლევს.