„აუტიზმი, რომლის სტატისტიკა ბოლო წლებში საგრძნობლად მზარდია, მსოფლიოსთვის ერთ-ერთი გამოწვევაა. ამ დღის მიზანი, აუტიზმთან დაკავშირებით საერთაშორისო საზოგადოების ცნობიერების გაზრდა, აუტიზმის მქონე ადამიანების უფლებების დაცვა და მათი უნარების რეალიზაციის ხელშეწყობაა,“- აღნიშნა აჭარის უმაღლესი საბჭოს ჯანმრთელობის დაცვისა და სოციალურ საკითხთა კომიტეტის თავმჯდომარემ - ვახტანგ ბერიძემ ირმა ხვიჩიას სარეაბილიტაციო ცენტრში სტუმრობისას.
საკანონმდებლო ორგანოს დარგობრივი კომიტეტის თავმჯდომარე, უმაღლესი საბჭოს წევრები - ფატი ხალვაში და მამუკა თურმანიძე, სარეაბილიტაციო ცენტრს აუტიზმის ცნობადობის ამაღლების მსოფლიო დღესთან დაკავშირებით ეწვივნენ და პატარა ბენეფიციარებს მათ საჭიროებებზე მორგებული საჩუქრები და ტკბილეულობა მიუტანეს.
ღონისძიებაზე, რომელსაც ცენტრის აღსაზრდელები, მშობლები და მედიკოსები ესწრებოდნენ, ყურადღება გამახვილდა აუტისტური სპექტრის მქონეთათვის სახელმწიფოსა და საზოგადოების მხრიდან მხარდაჭერის საკითხებზე.
ცენტრი, რომელიც რამდენიმე წელია წარმატებით ფუნქციონირებს, ბენეფიციარებს, სხვადასხვა სამედიცინო სერვისთან ერთად, აჭარის ჯანმრთელობისა და სოციალური დაცვის სამინისტროსა და ქალაქ ბათუმის მერიის შესაბამისი ქვეპროგრამებით გათვალისწინებულ მკურნალობის კურსს სთავაზობს.
